कोल्हापूर दि ३१ : कोल्हापुरातील मलकापूर वनविभागाने गुरूवारी रात्री जंगलात शिकारीची शस्त्रे घेऊन जाणाऱ्या दोन शिकारींना अटक केली.
मलकापूरचे वनपरिक्षेत्र अधिकारी अमित भोसले म्हणाले, “मौजे कडवे गावात काही लोक शिकारीसाठी जंगलात गेल्याची माहिती आम्हाला मिळाली. आम्ही तत्काळ सापळा रचून मनेश उर्फ सर्जेराव अनंत बेंडखळे (51) आणि अमर शामराव शिंदे (36, दोघे रा. कडवे-शिंदेवाडी) यांना रंगेहात पकडले. जंगलात खराची शिकार करून ते परतत होते. आरोपींकडून एक मृत ससा, एक परवाना असलेली डबल बोअर बंदूक, दोन जिवंत काडतुसे, एक वापरलेले काडतूस, दोन टॉर्च आणि एक मोबाईल फोन जप्त करण्यात आला आहे.
शाहूवाडी येथील न्यायालयात हजर केल्यानंतर आरोपींना एक दिवसाची वन कोठडी देण्यात आली आहे. पुढील तपास सुरू आहे.
भोसले पुढे म्हणाले, “नागरिकांना वनगुन्हे, बेकायदेशीर शिकार किंवा जंगलातील आगीबाबत कोणतीही माहिती मिळताच 1926 या टोल फ्री क्रमांकावर डायल करून जवळच्या वन अधिकाऱ्याशी संपर्क साधण्याचे आवाहन करण्यात आले आहे.
